قال احنا من كل عقلنا كل ما أجت حكومة منجيب هالزلم منصفطهم ع هالكراسي ومنصير نحلل بشخصية الرئيس وخبراته ومؤهلاته وتوجهاته وتاريخه السياسي وكيف لازم يعمل وشو بده يساوي حتى ينجح في تطبيق وتنفيذ كتاب التكليف الملكي ، مثل الدول اللي فيها رئيس الحكومة رئيس .

بقعدوا هالشباب وفيه منهم ختياريه أحيانا أكل الدهر عليهم وشرب وبصيروا يحللوا ، مصدقين حالهم انهم جماعة فهمانين ومحللين سياسيين واقتصاديين عندهم خبرة ولهم باع طويل في السياسة والاقتصاد في البلد وتسعين بالمية منهم بكونوا حرامية  منافقين ما واحد منهم بقدر يقول كلمة حق ،، كل اللي بقولوه حق يراد به باطل .

مجرد ما استقالت حكومة الخصاونه كل واحد سن سلاحه وصار يجرجد فيها ، صاروا كلهم يرددوا الكلمات اللي وردت في كتاب الملك للرئيس المستقيل واصبحت الأغنية المفضلة عند كل المحللين والسياسيين الانتهازيين أغنية ( ترف الوقت)  وأن الحكومة حكومة بطيئة ماطلت في الاصلاح وكانت تراوح مكانها .

 حتى عبد الكريم الدغمي رئيس مجلس النواب اللي هو مسؤول عن اقرار التشريعات مشان يركب الموجه ويرضي اللي فوق بلكي بيوم من الايام يحطوه في خزانة رؤساء الوزارات اللاحقين او السابقين وصف الحكومة بالسلحفائية . رووح يا عبد شوف حالك بالمراة ، شوف أي المخلوقات تشبه ، شوف شو بكتبوا عنك اللي بعرفوك ،، بقولوا والذمة ذمتهم انه انت ورا كل المصايب اللي صارت في مجلس النواب وانه انت اللي كنت السد المنيع في وجه محاربة الفساد وانك ركن اساسي من اركان مبنى الفساد و..و..و..و… وبس ، خليها بالقلب تسطح ولا تطلع بين الناس تفضح .

اللي بقرا كتاب التكليف للطراونه الرابع عشر !! اشي بحير ،، الكتاب بقول ان الحكومة انتقالية لمدة محددة ، بتجهز للانتخابات البرلمانية وبتروح . الانتخابات البرلمانية بالاردن صارت حلم ،  هي الحل لكل المشاكل ، خاصة المزورة ولا فيه احلى منها هيه بهيه !! 

فيه ناس قالوا للي فوق ما بحل المشكلة الا الانتخابات واقتنعوا بهالحكي وصاروا كل ما واحد زارهم يحكوا له قصة الانتخابات والتعديلات الدستورية والاصلاحات . الضيوف الاوربيون شو بدريهم !! ضيف ليلة ما بدبر عيلة  ، بفكروا انه الديموقراطية ديموقراطية مثل الديموقراطية اللي ببلادهم ، عشان هيك انبسطوا فينا هظيك المرة وشكرونا على الاصلاحات وحطولنا علامة كويسة ونجمتين وحدة على صباحنا والثانية على ….. ما بعرفوا انه فيه ديموقراطية بنكهة عربية وفيه منها بنكهة اردنية او بعرفوا وساكتين . 

  المطلوب انجازه من الحكومة بالاضافة الى الانتخابات كل واحد منها يحتاج الى عمر بحاله  . مطلوب من الحكومة بلورة سياسات اقتصادية وتنموية ، توفير فرص عمل ، محاربة (ألفأر ) ، وضع برامج للتأهيل والتدريب ، توزيع عوائد التنمية على المحافظات ، حماية المواطن من اثر التضخم ، التصدي لكل حالات وشبهات الفساد ، وضع ميثاق لتعزيز منظومة النزاهة الوطنية ، تنويع مصادر الطاقة .. بس !!! 

كل هذا بكم شهر ، سهل انك تطلب ،، سهل انك تكلف ،، سهل انك توجه ،،، سهل انك تقرا مواضيع الانشاء اللي بكتبها الآخرون ويعرضوها عليك عشان تعطي رأيك فيها خاصة اذا كانت مترجمة من العربي الى لغات أخرى ،، سهل انك تطلب من غيرك صنع المعجزات مادام لا يكلفك ذلك الا ان تقول وتمشي ، وما دمت تستطيع اتهامه متى شئت بالعجز والتقصير والاهمال والناس يصفقوا لك .

فيه واحد بعرفه معه مصاري كثير اتجوز اكثر من مرة ومش زابطه معه ،، كل يوم والا جاينا كرت عزيمه من دار فلان ،، شو فيه … قالوا فلان بده يتجوز ،، بتجوز وبطلق ،، كل ما اتجوز وحده بقولوا طلقها .. ما بتخلفش ،، صار متجوز بيجي عشرين وحده ، لا هو راضي يعترف انه العيب فيه ولا حدا قادر يقول له انه مش زلمه لأنهم مستفيدين منه وبخافوا يقطع عنهم الهدايا والعطايا .

خلينا نظل نحلل ،،، هاظا بيروقراط ،،، وهاظا تكنوقراط ،،، ما حدا قادر يقول انه كله  (.. آآط ) على البلاط .